Wanneer is “Doom” regtig “gloom” – Belê volgens die feite

Wanneer is “Doom” regtig “gloom” – Belê volgens die feite

Untitled (2)
Dit is artikels soos hierdie, wat meen dat die Amerikaanse markte is besig om in duie te stort, wat beleggers bang maak – veral na die dood van Iran se militêre leier as gevolg van die bom wat President Donald Trump laat val het. Almal vat hulle goed en hardloop vir die berge. Mense se vrese is ook nie sonder rede nie. As die Amerikaanse markte intuimel, sal dit ‘n wêreldwye impak hê soos in 2008, toe ‘n Amerikaanse probleem almal se probleem geword het.
Die vraag is egter wat doen ‘n mens met hierdie inligting? Moet ‘n mens al jou beleggings nou onttrek en onder die matras bêre; of ten minste alles kontant toe skuif?
Die eerste onmiddellike ding om te doen, is om niks te doen nie. Benoude katte maak benoude spronge, en gewoonlik is dit verkeerde spronge. Om geld te onttrek of meer konserwatief te skuif as markte af is, is die manier waarop jy jouself arm belê. As ‘n belegging aan die onderpunt van die kurwe skuif, net om dit weer terug te sit as die markte weer op is, is die ou klassieke voorbeeld van iemand wat met emosies belê en nie met verstand nie. Maar, wat sê die verstand? Wat sê die feite?
– Beleggingsfeit 1: Markte gaan op en markte gaan af – maar oor ‘n langtermyn sal jy altyd wen op die markte.
– Beleggingsfeit 2: Die hele prentjie vertel ‘n beter storie. Daar is ander feite wat ‘n mens ook in ag moet neem. Dinge soos, wat gaan die Amerikaanse Fed doen – gaan hulle rentekoerse verlaag of verhoog? Waar staan die VSA-China handelsoorlog op die oomblik? As ‘n mens na die hele makro-ekonomiese prentjie kyk, sê dit dat ‘n mens eerder versigtig en konserwatief moet wees as aggressief.
– Beleggingsfeit 3: Beleggings gaan egter primêr daaroor om te belê in ‘n maatskappy. As jy ‘n belegging uitneem of aandele besit, besit jy ‘n deel van ‘n maatskappy. Daardie maatskappy het waarde in die winste waarin hulle maak. Markte word deur sentiment en deur bangmaak-stories gedryf, maar oor ‘n langtermyn tydperk gaan dit oor die spesifieke maatskappy waarin jy belê. Het Sasol hierdie jaar goeie besigheidsbesluite geneem? Ens.
– Beleggingsfeit 4: Markte is siklies. Wat op, moet iewers weer af en wat af moet iewers weer op. Ons eie markte is die laaste 5 jaar negatief. Dit was net 2019 wat beter was en ‘n 10.44% groei opgelewer het. Beteken dit dat die volgende paar jaar goeie jare kan wees? Heel moontlik. Die waarheid is egter ons weet nie regtig nie.
– Beleggingsfeit 5: Jou risiko-profiel en jou beleggingsdoel moet die finale deurslag gee. Die tyd wat jy het om te gaan, en die hoeveelheid wat jy belê moet jou hier laat lei, of jy konserwatief, gematig of meer aggressief moet belê. Hoe jy voel, met ander woorde jou sielkundige ingesteldheid teenoor beleggings, behoort nie ‘n rol te speel nie.
Ten slotte, gebasseer op die breë prentjie van ‘n steeds wankelrige ekonomiese klimaat (ESKOM help nie hier nie) en ‘n oorverhitte Amerikaanse mark, is ek van mening dat ‘n mens eerder ‘n konserwatiewe as ‘n te oorversekerde beleggingsbenadering oor die korttermyn moet hê. Oor die langtermyn is die fundamentele aspekte van maatskappye baie belangrik. ‘n Maatskappy soos Sasol en baie ander se P/E ratio (wat beleggers bereid is om te betaal vir ‘n aandeel) is op historiese laagtepunte en juis nou goeie koopgeleenthede. Verder is ek maar versigtig vir die goud (wat op ‘n 3 jaar hoogtepunt is) en platinum sektor – “wat op moet af”. As jy dus wil spekuleer in die mark (wat ‘n korttermyn-oefening is), wees maar versigtig, maar vir langtermyn-beleggers is daar baie geleenthede op die oomblik.

Share this post

Leave a Reply

Your email address will not be published. Required fields are marked *